میزان بنک نے ایف بی آر کو شکست دیکر فائنل جیت لیا

   میزان بنک نے ایف بی آر کو شکست دیکر فائنل جیت لیا  لاہور(سپورٹس رپورٹر)پروفیسر مختار احمد بٹ میموریل کارپوریٹ کرکٹ لیگ کے 11ویں ایڈیشن کے فائنل میچ میں میزان بینک نے ایف بی آر کو شکست دے کر فائنل میچ جیت لیا۔اتفاق کرکٹ گراؤنڈ ماڈل ٹاؤن میں کارپورٹ لیگ کا فائنل میچ کھیلا گیا۔ اس موقع پر شائقین کرکٹ کی بڑی تعداد نے میچ دیکھا اور دونوں ٹیموں کو بھرپور سپورٹ کیا۔  چیف آرگنائزر فہیم مختار بٹ نے کہا کہ اپنے والد کی سپورٹس کیلئے خدمات کو خراج تحسین پیش کرنے کیلئے ہر سال اس ایونٹ کا انعقاد کیا جاتا ہے۔ جس میں کارپوریٹ سیکٹر کی بہترین ٹیمیں شرکت کرتی ہیں۔ فائنل معرکے میں ایف بی آر کی ٹیم نے پہلے کھیلتے ہوئے 9 وکٹوں کے نقصان پر 121 رنز بنائے۔ نوید اکرام 37 اور عاصم رضا 30 رنز بناکر نمایاں رہے۔ قیصر نوید، محمد اشتیاق اور ذیشان احمد نے دو،دو کھلاڑیوں کو پویلین کی راہ دکھائی۔ میزان بینک کی ٹیم نے مطلوبہ ہدف تین وکٹوں کے نقصان پر حاصل کیا۔ رضوان اکرم نے 55 رنز کی ناقابل شکست اننگز کھیلی، محسن پرویز نے 29 رنز بنائے۔ نوید اکرم، عدنان رضا اور محمود جعفری نے ایک،ایک وکٹ حاصل کی۔ محسن پرویز شاندار کارکردگی پر مین آف دی میچ قرار پائے۔ ڈیسکون کے رانا طاہر ٹورنامنٹ کے بہترین کھلاڑی اور بہترین بیٹر،یو سی ایس کے حماد عزیز بہترین بالر، یو سی ایس کے مسلم رضا بہترین فیلڈر،میزان بینک کے حق نواز بہترین وکٹ کیپر،آئی سی آئی پاکستان اور پیکجز کنورٹر لمیٹڈ بیسٹ ڈسپلن ٹیمیں قرار پائیں جبکہ ایف ایف سی، ٹی جے انٹرنیشنل اور کلئیر پاتھ کی ٹیموں کو بہترین ایمرجنگ ٹیموں کو ایوارڈ دیا گیا۔ مزید : کھیل اور کھلاڑی –
Source : https://dailypakistan.com.pk/29-Nov-2022/1514364

اپنا تبصرہ بھیجیں