ٹیسٹ سیریز انگلش کرکٹ ٹیم 17سال بعد پاکستان پہنچ گئی 

ٹیسٹ سیریز، انگلش کرکٹ ٹیم 17سال بعد پاکستان پہنچ گئی              لاہور(سپورٹس رپورٹر)انگلش کرکٹ ٹیم پاکستانی سرزمین پر 17 سال بعد ٹیسٹ سیریز کھیلنے کیلئے اسلام آباد پہنچ گئی ہے،انگلینڈ اور پاکستان کے درمیان تین میچز کی سیریز یکم دسمبر سے شروع ہوگی،انگلش کرکٹرز آج سے کرکٹ سرگرمیوں کا آغاز کریں گے۔تفصیلات کے مطاق بین اسٹوکس کی قیادت میں انگلینڈ کی ٹیم ہفتے اور اتوار کی درمیانی شب اسلام آباد پہنچی جہاں پی سی بی حکام نے ٹیم کا استقبال کیا۔انگلینڈ کے خلاف تین میچوں پر مشتمل ہوم ٹیسٹ سیریز کے شیڈول کے مطابق یکم دسمبر سے شروع ہونے والی سیریز کے میچز راولپنڈی، ملتان اور کراچی میں کھیلے جائیں گے۔ پہلا ٹیسٹ یکم دسمبر کو راولپنڈی بقیہ دونوں میچ بالترتیب 9 اور 17 دسمبر کو شروع ہوں گے، یہ میچز بالترتیب ملتان اور کراچی میں کھیلے جائیں گے۔پی سی بی کے مطابق یہ پہلا موقع ہوگا کہ انگلینڈ کی ٹیم راولپنڈی میں کوئی ٹیسٹ میچ کھیلے گی جبکہ قومی ٹیم یہاں 12 میچوں کی میزبانی کرچکی ہے، جس میں سے 5 میں فتح اور 3 میں شکست کا سامنا کرنا پڑا ہے۔انگلینڈ کی ٹیم نے آخری مرتبہ 2005 میں پاکستان کا دورہ کیا تھا۔ اور آخری ٹیسٹ ملتان میں کھیلا گیا تھا جہاں انگلینڈ کو 22 رنز سے شکست ہوئی تھی۔ملتان میں اب تک کھیلے گئے 5 ٹیسٹ میچوں میں سے پاکستان کو 3 میں کامیابی اور ایک میں ناکامی کا سامنا کرنا پڑا۔انگلینڈ کی ٹیم رواں برس سیریز کا آخری میچ کراچی میں کھیلے گی جہاں 2000 میں ناصر حسین کی قیادت میں انگلینڈ نے کامیابی حاصل کرکے نیشنل اسٹیڈیم میں پاکستان کی مسلسل 34 فتوحات کا سلسلہ توڑ دیا تھا۔نیشنل اسٹیڈیم کراچی میں اب تک پاکستان کو 23 ٹیسٹ میچوں میں کامیابی اور صرف 2 میچوں میں شکست کا سامنا کرنا پڑا ہے۔دونوں ٹیموں کے مابین کھیلی جانے والی 3 ٹیسٹ میچوں کی یہ سیریز آئی سی سی ورلڈ ٹیسٹ چیمپئن شپ کا حصہ ہے، چیمپئن شپ میں انگلینڈ کی ٹیم ساتویں اور پاکستان پانچویں نمبرپر موجود ہے۔شیڈول کے مطابق پہلا ٹیسٹ یکم تا 5 دسمبر کو راولپنڈ میں کھیلا جائیگا،دوسرا ٹیسٹ 9 تا 13 دسمبر ملتان کو کھیلا جائیگا،تیسرا ٹیسٹ17 تا 21 دسمبر کوکراچی میں کھیلاجائیگا۔انگلینڈ کے خلاف ٹیسٹ سیریز کے لیے پاکستان کے 18 رکنی اسکواڈ کا اعلان کردیا گیا ہے جس کے مطابق ٹیم کی قیادت بابر اعظم کریں گے جبکہ دیگر کھلاڑیوں میں محمد رضوان، عبداللہ شفیق، ابرار احمد، اظہر علی، فہیم اشرف، حارث رؤف، امام الحق، محمد علی، محمد نواز، محمد وسیم جونیئر، نسیم شاہ، نعمان علی، سلمان علی آغا، سرفراز احمد، سعود شکیل، شان مسعود اور زاہد محمود شامل ہیں۔    مزید : کھیل اور کھلاڑی –
Source : https://dailypakistan.com.pk/28-Nov-2022/1513786

اپنا تبصرہ بھیجیں